政情：瘦咗流鼻水姚思榮惹流感疑雲

游水習慣成日抹鼻

姚思榮話近排不時出現鼻水，而且自己身形瘦咗，所以會令人誤以為佢病咗。然而，佢就自爆係因為自己勤力維持游水習慣，所以身形Fit咗先變得瘦削，至於鼻水問題就更加好笑，佢話係游水期間有泳池水入咗鼻腔，需要過咗幾個鐘先慢慢流番出嚟，其他人見佢不時抹鼻，先會惹來患病疑雲囉！睇嚟佢嘅朋友可以放心，因為佢係勤力做運動變得健康，而唔係病咗嘞！

另外，去旅行除咗怕生病，亦怕受天氣問題影響，好似早前日本就有唔少航班受大雪影響而延誤。姚思榮就話業界已累積唔少經驗應對，加上港人已經有購買旅遊保險嘅習慣，所以天氣影響比以往細得多。