政情：岑智明電費唔夠林超英少
天文台前台長林超英出名非常環保，電費極低，現任天文台台長岑智明日前出席「名師高徒」導師計劃時都話，「跟唔到佢咁犀利，個電費梗係唔夠佢咁低啦」，但自己夏天盡量都唔開冷氣，淨係最熱嗰幾晚先開，如果頂得順，就會開一陣就熄番佢，轉為開風扇，至於冬天就喺十二度以下，先會開一個好細個嘅暖爐。
近日天氣開始轉冷，有啲市民都關注會唔會再出現結冰等極端天氣，岑智明話極端天氣好難預測，因為極端即係好少機會發生，至於往年曾經有市民特登去大帽山睇結冰，佢就呼籲大家千祈唔好咁做，咁樣等同以身犯險。
籲市民不斷更新天氣資訊
對於有市民成日批評天文台預測唔到極端天氣，佢就認為依家嘅市民過於迷信電腦，認為「AlphaGo捉棋都打敗人咯，有乜嘢預測唔到呢？」其實市民咁樣諗唔啱，大自然好多嘢都深不可測，預測愈遠愈易有變數，即使依家天文台有九天天氣預報，市民都應該不斷update吓，愈近日子就愈準，呼籲大家唔好因為過早嘅天氣預報，而決定晒啲嘢呀！