政情：審創新辦開位葉劉潛水莫乃光救亡
政府打算改組中央政策組變為「政策創新與統籌辦事處（創新辦）」，以吸納年輕人嘅意見，兼申請開六個常額職位。人事編制小組委員會尋日第三度開會討論建議，一直質疑改組成效嘅委員會主席葉劉淑儀缺席會議，由副主席楊岳橋（Alvin）坐正主持，而會議只得十二人出席，其中六名泛民議員，五人投反對票，唯獨民主派會議召集人兼資訊科技界議員莫乃光（Charles）做救兵投票支持，最終喺六比五、掹車邊嘅情況下通過開位建議。
由楊岳橋頂上主持會議
政府早排登廣告以高薪請政策及項目統籌高級及普通主任，月薪介乎三萬至最高嘅九萬五千元，吸引唔少年輕人蜂擁而上報名。呢次嘅開位建議先後喺公務員及資助機構員工事務委員會同人事編制小組委員會討論，葉劉曾多次公開批評改組係開倒車、公務員化，仲話高薪請年輕人係同智庫搶人，但尋日人事編制委員會再次審議有關建議，葉劉冇出席。頂更嘅Alvin話唔知點解葉劉唔到，只係被通知要主持會議。葉劉缺席先通過建議，不禁令人聯想係咪想逃避抑或唔想含淚睇住建議獲得通過？
葉劉質疑年輕人做統籌
葉劉解釋話呢排委員會成日加會，加上工務繁忙，唔可以吓吓都坐定主持會議。咁係咪唔支持開位建議？佢就話係對改組有疑問，質疑年輕人上場係咪真係做到統籌工作。至於建議交付財務委員會審議時仲會唔會再追問？佢就慨嘆唔會妨礙政府工作，強調改組成效有待觀察。
至於點解Charles會投票支持？佢笑住話不嬲都叫政府做好統籌工作，上次會議政府都承認已經研究緊共享經濟，反問點解唔支持？佢仲話應該要關心吓點解建制派冇人落嚟開會好過喇。不過，喺會上出盡火力炮轟政府嘅人民力量陳志全就好嬲，話如果冇咗Charles嘅關鍵一票，就可以否決建議。
其實建議能夠獲得通過，過程可謂驚濤駭浪，皆因如果葉劉出席會議，Alvin做委員投票，咁就可能會出現六比六嘅情況，按慣例委員會主席就要投下必然反對票，到時就會拖垮政府開位建議，Charles亦做唔到救兵，所以葉劉缺席是好定壞？真係好難講得實。