政情：邱榮光父子檔推廣環保
早前一個由環保協進會協辦嘅研討會上，除咗有「環保博士」之稱嘅總幹事邱榮光講話，該會研發主任邱亦聰（Henry）都有份負責其中一個環節。呢位邱姓研發主任非常年輕，加上容貌同邱榮光相似，就惹嚟在場人士猜測佢哋到底有冇血緣關係？
今年只得廿三歲嘅Henry其實係邱榮光嘅二仔，上年先大學畢業，由英國返嚟香港，由於修讀政治與法律，所以現時除咗幫忙搞環保，亦都擔任緊立法會議員助理。但問佢係咪有意參選從政，佢就話係有排嘅事，仲講明鍾意環保多啲添！
曾逼囝囝做環保大使
Henry又講到日常生活一定會做足回收同分類，但認為要將呢個行為普及有難度，事關需要改變習慣，仲大嘆好彩年幼時社會已開始提倡分類添。而邱榮光就話自小已經培育兒子環保意識，曾經帶佢去觀鳥，盡量令到佢關心環境，Henry就大爆，細個時畀爸爸逼做環保大使，證明邱榮光真係由細就教導環保知識喎。