政情：DQ馮檢基 泛民「釋法」認係Plan B

民主動力尋日就初選諒解備忘錄召開會議，召集人趙家賢喺會後再次確認，民主派補選嘅機制不變，並同意馮檢基退出後，得票第三多、「Plan C」民主黨區議員袁海文補上。換言之，即係喺「屈基」後，先釋法確認佢係Plan B喇！

立法會前議員姚松炎早前勝出民主派九龍西初選，其後亦已報名參選，但由於過去佢曾因宣誓風波已被取消議員資格，民主派曾就替代人選方面作討論。根據民主派初選備忘錄，如得票最高嘅參選人被取消資格，將會依排名由「Plan B」、「Plan C」補上。

將商討由袁海文補上

趙家賢話現時馮檢基退出，即由袁海文作為姚松炎的替代人選，而民主黨中委會將於今晚開會商討事件。

至於一旦袁海文決定退出，會唔會再有「Plan D」等替代嘅人選，趙家賢話冇任何「Plan D」，而且，民主動力亦都冇角色去處理。

有傳言指公民黨前成員曾健超係「Plan D」，趙家賢引述曾健超話自己唔係「Plan D」，又話曾健超自言冇接受邀請做「Plan D」。另外，已報名參選立法會九龍西補選嘅仲有民建聯嘅鄭泳舜。