政情：建制防泛民突襲 謀包攬正副主席

落實一地兩檢「三步走」程序只剩餘本地立法程序，而為咗趕及喺今年第三季通車，政府就多次表明希望能夠喺七月立法會暑假休會前獲得通過。不過，以七月作為目標其實非常緊迫，因為審議過程並唔簡單，政府要先提交法案，經立法會大會進行首讀及二讀，然後再成立法案委員會負責審議，而法案委員會審議完畢後先會交番去大會三讀表決，尤其身兼一地兩檢關注組召集人、公民黨嘅議員陳淑莊等泛民議員極力反對一地兩檢方案，必定有好多動作，以立法過程咁長嚟講，確有機會畀泛民偷襲。

葉劉張國鈞列考慮人選

雖然草案未提交立法會，但建制派已經不敢怠慢。據聞建制派曾初部商討部署，仲傾過法案委員會嘅主席人選，而新民黨主席葉劉淑儀係其中一個人選。另外，一般法案委員會未必需要設立副主席，但因為預計今次法案委員會開會次數頻密，所以將會開設副主席一職，而建制派密謀包攬兩個職位，而張國鈞亦喺考慮之列，若果最後落實係呢兩個人選，即正副主席都係身兼行政會議成員。有建制派人士透露，係葉劉主動提出擔任主席，直言佢係重量級人士，且具有經驗，相信可以鎮得住場面喎。

其實葉劉曾出任入境處處長同保安局局長，對一地兩檢嘅工作有相當嘅認識，而當年港深西部通道計劃興建時已預咗會實行一地兩檢，葉劉當時亦係行會成員有份參與，所以佢確係經驗豐富去主持法案委員會。至於張國鈞則擁有律師背景，出任副主席都可以從法律方面幫手。

建制派早作部署，反觀泛民現時則深陷於立法會補選內訌嘅泥沼當中。有泛民中人透露，仍然未就一地兩檢法案委員會作出討論，直言近期有唔少議題要注意，可能出現漏招。更有泛民坦言，按議會人數計算，泛民一定無法當選法案委員會嘅主席添！