中環出更：家鄉土樓爛到冧高永文倡做好保育
中國歷史悠久，唔少地方都有珍貴建築，但就未必全部都做好保育。食物及衞生局前局長高永文話喺約兩星期前曾返家鄉考察土樓，失修嚴重到連行樓梯都唔敢孖住人一齊行，「一個人上樓梯，第二個唔好上呀」，佢近年幾乎每次考察，都會發現又冧多一幢土樓，好擔心遲吓愈冧愈多，希望當局做好保育喎。
高永文話大家比較留意到鄰近福建嘅土樓，其實係最大嘅橢圓形、最大嘅圓形同最大嘅八角形土樓都喺佢嘅家鄉潮州，可惜被忽視，佢最近考察咗最大嘅八角形土樓「道韻樓」，由於係木結構為主，佢只敢一個人行上樓梯添，如果唔做好維修，好可能會破壞原本嘅建築風格。
林楓林話住戶唔敢住樓上
同行嘅潮汕文化協進會顧問許百堅就話以前可以到樓上睇，但依家已經唔可以嘞，因為失修嘅關係，內部要靠支架支撐，部分已經冧埋，今次去考察都係求相關人士先可以到樓上。國際潮團總會常設秘書處執行秘書長林楓林就話呢幢土樓仲有十幾戶住喺地下嗰層，失修到唔敢住樓上，聽講當地政府都希望做好土樓保育，希望研究會否變成旅遊景點。
高永文講起同許百堅相識於約二十年前，喺潮州商會青年委員會時發現劉文文、陳智思等潮州二代，原來潮州話都麻麻哋，所以就搵咗許百堅嚟教潮州話，後來仲發展成多間大學嘅校外課程添！高永文又話自己到十八歲都未返過家鄉，因為當時未改革開放，一直只係聽媽媽講家鄉嘅故事，長大後才返家鄉搵地道小食，仲大爆媽媽喺三、四十歲嘅時候，係教啲十幾歲嘅女仔教潮繡，可惜依家已經搵唔番媽媽嘅手藝嘞！
卓妮