政情：尹兆堅被翻舊帳 CY上身告誹謗

不追究議案獲得通過後，何君堯同多名建制派議員步出會議廳，又再鬧反對派以議案作反噬，跟住又話：「揸車冇有效行車證，又冇第三（者）保（險），仲滿口仁義話人哋唔啱，呢啲人要認清楚」，佢直指呢個人係尹兆堅，指尹喺舊年被判有罪，卻駕車出入議會，強調有圖為證添！

吸取教訓 記低續牌日期

咁啱喺側邊嘅尹兆堅就要求何交出證據，「你作為律師你亂講啊」，要求對方查清楚先作指控。佢仲話：「你慣咗錯吖嘛，殺無赦嘅特色，我咪要糾正你囉」，佢更要求何道歉，何反稱「我梗係唔道歉啦」，尹則叫何等收律師信。

尹兆堅事後重申何君堯嘅指控失實，將發律師信要求澄清同道歉，又強調吸取咗嗰次違例事件嘅經驗後，已用手機記低續牌嘅日期，避免同類事件發生。