- on.cc 東網主頁
- 3月31日 (一)
立法會四席補選下周二就開始接受提名，但有意參選港島區嘅新民黨南區區議員陳家珮（Judy），早個禮拜竟然仲有時間一個人喺中環行街睇衫，原來佢係想揀番幾件搶眼啲嘅「戰衣」，供將來出席選舉論壇及落區拉票時着，可惜揀咗一輪都係空手而回。
卓妮上周五下午喺中環國際金融中心二期，見到Judy一個人行嚟行去，先後入咗幾間時裝店揀衫，而且專揀啲顏色鮮艷嘅女裝大褸。不過，佢睇完一間又一間，行完一層又一層，搞咗成粒鐘都好似唔啱心水。期間佢乘坐扶手電梯落下層時，有兩個小學生奔跑撞到Judy，Judy就笑笑口咁應對，冇因為買唔到戰利品而黑面。卓妮事後向Judy查詢，佢透露近期天氣轉冷，自己啲舊大褸顏色較沉，因此想搵番件鮮色啲，例如係紅色嘅大褸作為選舉戰衣，可惜呢期啲秋冬女裝都係以深色為主，最後揀唔落手。
不過Judy透露，由於佢同新民黨主席葉劉淑儀嘅身高相若，對方又出名識得揀衫着，葉太已借咗幾件褸畀佢頂住先。葉太近年多次參選立法會都高票當選，其戰衣可能沾到好運，Judy當然唔介意着佢舊衫喇！
卓妮
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |
