政情：拓展網售 梁智宏去檔口執貨
俗語話「創業難，守業更難」，近年唔少老店被迫結業，但有啲老店後人就重整旗鼓轉戰網上生意吸金！就好似「丑生王」梁醒波嘅孫仔梁智宏（Andrew）接咗家業做食品生意，依家就主打罐頭鮑魚同XO醬，以網售為主，只係間中擺檔口，令更多客人認識品牌同貨品。睇落無間舖會得閒啲同無咁困身，但其實網上生意要做得好都要落手落腳做，隨時覆客訊息仲忙過落舖呀！
巡檔Sale客補貨一腳踢
早排喺中環一家超市就見到Andrew孭住一大袋貨，去到檔口幫手執貨同教Sales點樣賣貨。見到有客人行埋嚟，Andrew都一樣要Sale客，兼同客人傾偈緊貼市場消息。Andrew話依家公司喺中環同銅鑼灣兩家超市擺檔，佢就要負責巡檔同補貨，平時接網購訂單就要逐個客覆，又要安排物流送貨。乜嘢都一腳踢嘅佢仲話，由於幾個大節日接住嚟，估計要去到農曆新年後先有得抖吓！不過忙都有價值嘅，佢話依家生意好好，慢慢上升緊。