的哥街頭爆粗格鬥
【本報訊】「搵食啫，使乜搵命博呀！」過去不時有的士司機開工時發生爭拗，輕則口角，重則大打出手，近日網上再流傳影片，有的哥爆發激烈罵戰，繼而即席在街頭上演格鬥賽，打得拳來拳往，旁人亦欲勸無從，雖然最終不知誰是誰非，但有網民睇片後好言相勸，謂「加埋過百歲，好心收下火啦！」
該片近日在網上流傳，片段是在一架的士車廂向外拍攝，現場有多部紅、綠的士停泊，拍片者駕車時，發現幾名的士司機聚集，互相以粗口問候。其中兩名身穿青色和灰色上衣的哥情緒最為激動，互相指罵。
拍片者及後停下，繼續拍攝情況，未幾兩人由口角變為動武，兩人鬧得面紅耳赤之際，有人突然出拳，對方亦唔輸蝕隨即還手，兩人拳來拳往，打得拳拳到肉，睇見都痛。之後灰衣者首先跌在地上，另一方亦被絆倒墮地，兩敗俱傷，由旁邊友人扶起才告收手。