政情：退休前最後一日 潘佩璆睇症冇食晏

潘佩璆早前喺Facebook回顧自己喺聯合工作嘅最後一日。佢話朝早同老婆去油麻地果欄買水果送畀同事，之後返門診睇症。點不知，朝早嘅病人呢頭睇完，下晝嘅病人已經嚟到，搞到佢晏晝飯都冇得食，連班同事請佢食嫁女餅都無時間食。直至下晝五點鐘睇完最後一位病人先得閒食晏，而門診部同事就捧紮花同賀卡歡送佢。

繼續做義工 未計劃開診所

唔少人得知潘佩璆退休後，就留言讚佢係好醫生、愛心醫生、仁醫等，更有醫院同事留言，叫潘佩璆得閒就返去同大家聚會。另外，有人關心佢會唔會繼續開診所行醫，潘就留言話，以後會繼續參與義務工作，但唔係以醫生身份，暫時亦未有計劃開診所，唔知有乜新搞作呢？