政情：阻削響鐘時間 泛民屎尿齊出
立法會尋日繼續審議政府提出嘅高鐵西九龍站一地兩檢議案，繼官員發言總結後，首個由毛孟靜提出嘅修正案遭否決，此時民建聯李慧琼動議將點名表決時間由五分鐘縮短為一分鐘，多名民主派議員趁機就動議發言，務求「拉布」不惜搬出大、小便議題。
身兼泌尿科專科醫生嘅公民黨郭家麒發言時話，國際文獻指一名成人嘅如廁時間大約為五十幾秒，佢話假如表決鐘聲僅一分鐘，擔心連同前往廁所嘅路程，議員難以完成如廁，尤其係年紀大嘅議員；其後佢又指女廁廁格數目少，恐怕如廁時間更長。
最終都通過 縮至１分鐘
身兼行會成員嘅林健鋒批評郭家麒猜測議員如廁時間，話「佢（郭家麒）如果去廁所要十分鐘，但唔可以猜測我哋都係」，主席梁君彥亦提出有關質疑，郭家麒就話去廁所係人嘅本能，又指「主席我都見你有去啦」。
其後專業議政梁繼昌同樣提及如廁時間，指研究顯示二十至三十歲成人需要至少二十一秒如廁，同樣指一分鐘恐怕趕唔切返回會議廳，反對縮短表決鐘聲。而縮短表決鐘聲嘅議案最終仍獲得通過。