性感就話難定義，但係火辣身材嘅定義卻好容易，皆因玲瓏浮凸嘅三圍顯而易見。不過擁有魔鬼級身材，卻同時擁有誘人氣質嘅話，就冇幾多個。而嚟自南韓嘅人氣模特兒趙藝真，樣貌、身材同氣質兼備，被喻為模特兒界中嘅妖精。
如果以為一位索模只要露吓肉，賣弄一下性感就能吸引大家嘅目光嘅話，實在係膚淺嘅諗法。要成為一位長期都處於人氣高位嘅模特兒，單憑外在誘惑係唔足夠，仲需要有氣質至得，否則趙藝真又點會喺南韓模特兒界紅足咁多年呢？於2010年喺國際電玩展中以Show Girl身份首次登場嘅佢，穿上性感制服示人，不但令前凸後趷嘅火辣身材盡情展現，尤其係一對35吋爆乳，更係成為展場上嘅焦點。雖然佢第一次演出，但卻表現得相當淡定，甚至跟攝影師進行互動，完全唔似剛出道嘅新人，除非佢天生注定食呢行飯，否則點解處女登場會有如此好表現呢？原來早喺讀書時期，佢已經對模特兒工作有濃厚嘅興趣，成年後便開始兼職模特兒，並且活躍於攝影模特兒界。畢業後，佢正式成為職業模特兒，因為佢有相當攝影模特兒經驗，難怪初登場嘅表現便已經如此淡定又亮眼。
首次演出獲得成功後，跟住落嚟可以用全力爆發嚟形容趙藝真，事關佢喺眾多電子產品展示會、婚宴展銷會、商場騷等活動中登場外，同時佢踩入車模界，化身成性感美艷車模喺展場上演出，此外，佢亦擔任賽車女郎，並先後喺首爾同釜山多場賽事中，以超性感賽車女郎造型登場，因而紅爆網絡。
問到趙藝真喺咁多種模特兒工作中，覺得邊類型做得最開心時，佢就話係攝影模特兒，因為工作時間比較短同埋工作壓力冇咁大。原來隨住事業大爆發，工作量大增嘅同時，負面影響亦喺佢嘅健康上浮現出嚟，2012年佢便大病一場，令佢不得不將所有工作暫停。一心諗住可以快啲做出成績嘅佢，不知不覺令身心都承載住巨大嘅壓力，起初佢都冇為意，以為自己休息時間不足，諗住食啲補品就冇問題，直到健康急轉直下，至知自己嘅身體已經亮起紅燈，喺休息期間佢主要陪屋企人同去旅行減壓，而喺呢段日子佢明白到工作同健康一定要平衡。經過半年嘅休息後，佢重返模特兒界，工作態度依然認真，不過唔會好似以前咁一味死做爛做，懂得放鬆自己，得到充分嘅休息，令自己嘅狀態得以保持。佢笑稱睇番自己壓力最大時期嘅演出，發覺精神同皮膚嘅狀態都好差，好彩因為大病一場，先至知道應該點樣令自己可以長期保持最好嘅狀態。講到未來嘅發展，佢認為先做好模特兒工作後，至考慮會唔會朝住演藝界發展。
簡介：趙藝真嘅美貌加上火辣身材，任何男士見到佢都會留下深刻嘅印象，而佢亦一啲都唔吝嗇展現自己魔鬼身材嘅機會，只要配合到活動同攝影工作嘅主題，都會以超性感嘅形象示人。擁有如此天賦本錢嘅索模，試問又點可能唔成為男士心中嘅女神呢？如果大家想了解佢多啲，就要Click入呢個網站喇！
網址：http://cafe.daum.net/cuteyejin
出生地：首爾
身高：170cm
三圍：34、25、35
撰文：魂