政情：「議員夢」仲未醒 黃之鋒又覆核

挑戰「入獄後5年禁參選」規定

眼見二○二○年換屆選舉隨時無份，黃之鋒再演一次「司法覆核」戲碼，繼上次挑戰年滿二十一歲先可參選立法會嘅規定失敗後，再鬧監禁三個月以上就五年不得參選嘅限制唔合理。咁唔死心，可見佢恨做立法會議員恨到發燒，為咗自己能夠參選，可謂無所不用其極。

黃之鋒預告今日會同服刑中嘅眾志常委林朗彥，入稟法院申請司法覆核，指現時選舉條例內，監禁三個月以上便五年不得參選嘅規定係唔合理。對於被判囚六個月，目前保釋等候上訴嘅黃之鋒而言，有關要求猶如為佢「度身訂造」，佢為自己鋪路參與下屆立法會選舉嘅意圖路人皆見。

其實今次並唔係黃之鋒首次欲以司法覆核幫自己參選鋪路，佢喺舊年二十歲時，就曾經入稟申請司法覆核，要求法庭將參選立法會嘅年齡限制由二十一歲降至十八歲，但最終被高等法院拒絕批出司法覆核許可。