政情：多料議員成日坐 劉業強呻肥咗

冇用過立會健身室

劉業強平時要兼顧行政會議、立法會、區議會同埋鄉議局，佢話現時各級議會嘅會議時間都經過協調唔會撞期，所以仍然兼顧得到，但就要犧牲睡眠時間同埋逢星期六嘅運動日囉！佢仲話，自己運動量減少而長肉，仲即場拍吓自己個肚腩顯示無講大話。

話時話，立法會設有健身室畀議員用，佢都可以用嚟減磅啫。劉業強就話未參觀過健身室，而且拉布期間健身會趕唔切沖身。其實健身室過往被指殺氣重，常客多數無法連任，劉業強就話未聽過呢個傳聞，仲大嘆好彩未用過喎！