政情：唔自薦入政府 霍啟山讓路畀青年
政府早前推出青年委員自薦試行計劃，接受年齡介乎十八至三十五歲嘅青年自薦加入五個政府諮詢架構，廣東青年總會執行主席霍啟山日前出席一個青年活動時話，自己對青年工作好有興趣，但暫時唔會自薦，要將機會留畀其他人，亦會鼓勵身邊嘅後生仔去申請。
啟山話，今次政府推出嘅只係第一期計劃，未來會有更多唔同嘅委員會接受青年自薦。佢之前已經擔任過海濱事務委員會成員，仲做足六年，如果有機會都會想嘗試出任其他委員會。問佢最感興趣嘅係咩範疇？佢就冇答，只係話始終要以自己興趣為依歸，好似大家都知佢熱愛足球，明年就會搞一場粵港澳大灣區青少年足球比賽。
林月萍盼年輕人多了解社會
講番個活動係「香港青年服務領袖獎」獎勵計劃發布會，今屆主席林月萍話，社會責任感、卓越領導能力及出色嘅溝通能力喺青年嘅成長歷程中具有非常關鍵嘅作用，因此希望透過計劃培養熱心服務社會嘅未來領袖，佢亦鼓勵年輕人加入諮詢架構，多啲了解社會。