中環出更：丁煒章搞創新還是經典最賣得
香港工業總會轄下嘅香港優質標誌局（優標局）早前舉行周年晚宴，向一班企業頒發Q嘜准用證及人氣品牌大獎。優標局主席丁煒章（Bernie）話，Q嘜計劃除咗鼓勵企業發展優質品牌，亦希望企業持續改良同埋革新產品。佢就試過為家族生產、食大閘蟹必備嘅大力剪度橋搞創新，點知無論點樣轉顏色、增加功能，最後都係攞到Q嘜嘅白色經典款式最賣得，諗起都覺得好笑咁話。
Bernie係工總名譽會長丁鶴壽個仔，家族做開玩具生意，大家見慣見熟嗰把大力剪都係佢公司出產，喺全港嘅市場佔有率最大。
葉中賢研物聯網注咖啡機
Bernie笑笑口話，佢好努力搞創新，諗住挑戰一下自己，試過推出長短柄、分左右手版本嘅大力剪，方便畀左撇子使用，又試過推出價格平啲、五顏六色嘅款式，但係始終都係貴啲嘅Q嘜款最受歡迎，連Bernie自己都笑稱冇晒符。
生產咖啡機嘅工總副主席葉中賢都致力創新。佢就研究將物聯網（IoT）功能注入咖啡機，即透過手機傳輸煮咖啡嘅配方到咖啡機，就可以同朋友分享唔同咖啡豆嘅煮法同心得，仲可以累積到大數據，方便發展更多產品喇！
同場仲有工總主席郭振華、名譽會長丁午壽、鍾志平及鄭文聰等業界前輩，丁煒章媽媽丁曾詠軒都有到場支持個仔。鍾志平話，澳門都有好多港人熟悉嘅知名品牌及商家，工總正打算透過同當地商會合作，將Q嘜計劃推廣到澳門。
卓妮