中環出更：憶校長好嚴厲葉詠詩：我係乖學生
民生書院前校長陳伯民早已退休多年，但適逢早前佢一百歲生日，學校特別為佢舉行生日晚宴，唔少畢業生同教育界人士都有嚟祝賀。香港小交響樂團音樂總監兼著名指揮家葉詠詩亦係校友之一，佢憶述校長當年特別嚴厲，不過好彩自己都係乖學生，所以都唔係咁驚，而民生書院嘅禮堂亦係佢首次練習公開指揮嘅地方添！
葉詠詩話以前中學喺禮堂考試，早會喺禮堂，民生係基督教學校，自己識彈琴，一向都有份輪流做司琴，而學校合唱團一向都有參加比賽，臨比賽前會喺早會試唱，用以練習公開演出，合唱團時常喺校際音樂節攞獎，自己喺中五嗰年，負責指揮低年級合唱團嘅老師剛好懷孕，就搵咗佢幫手指揮校際音樂節比賽，當年佢十六歲，嗰次比賽係佢第一次喺公開場合指揮，就係喺學校禮堂練習o架啦！
施俊輝係校友會教育小組成員
轉頭見到同係校友嘅教育局局長政治助理施俊輝及教育城行政總監鄭弼亮，施俊輝話有班校友係從事教育，所以校友會有個教育小組；鄭弼亮都記得陳伯民校長好嚴厲，好多同學印象都深刻，校長喺早會一出現，大家就靜晒。
陳伯民致詞時都感嘆自己係令每個學生都怕嘅校長，係最差嘅。不過見到咁多位師生為校長慶祝生日，相信佢哋完全冇怪校長，反而係一個好好嘅校園回憶。
拔萃男書院前校長張灼祥都在場，但佢唔係民生舊生，只因佢同民生書院現任校長陳嫣虹曾經先後擔任另一間中學嘅校長啫！張灼祥講起以前拔萃男書院同民生都有交流生計劃，講到最刺激係同「死敵」喇沙書院搞交流生計劃，兩間學校嘅學生都要打對方嘅校呔，認真難忘！
卓妮