中環出更：屋企爆水管 蕭偉強退而難休
政府順利過渡之後，唔少卸任嘅局長都慢慢搵到好路數，但真係退休嘅高官近況又如何呢？勞工及福利局前局長蕭偉強喺卸任前就已經決定咗要休養生息，希望可以過番啲退休生活。之不過，佢屋企早前就發生咗啲小插曲，搞到蕭偉強退休之後仲忙過未退休喎。到底佢搞邊科？
曾任職復康專員嘅蕭偉強，退休後都不忘出席復康組織舉辦嘅活動，甚至獲邀出任榮譽顧問，同勞福界仍保持密切聯繫，佢早前現身一個社區活動時就透露，原來佢喺卸任局長嘅前一日，屋企就不幸地爆咗水管，搞到成屋好多地方都浸晒鹹水，真係想唔裝修都唔得呀！事件搞到蕭偉強要租另一間屋畀屋企人暫住，之後仲要搵埋師傅搞裝修，所以仲忙過未退休嗰陣。
早前同老婆去高雄歎世界
但蕭偉強早前就忙裏偷閒，同太太一齊去咗高雄旅行歎世界，仲話退咗休之後先有機會放吓假，依家旅行仲可以慢慢睇真啲唔同地方嘅特點，以前真係冇咁嘅機會喎。
卓妮