政情:履新逾月 利申無影

新政府上任已兩個多月,首批公布嘅副局長及政治助理名單,合共有十二人喺八月二日履新,至今上任超過一個月時間,舊面孔有上屆政府過渡至新政府「升呢」為商務及經濟發展局副局長嘅陳百里,新面孔則有教育局副局長蔡若蓮等人,但無論新舊面孔,佢哋按照《政治委任制度官員守則》作出嘅利益申報,至今仍然未上載至政府網頁,唔知今次事件係涉及有人遲遲未申報累街坊,定係內部溝通出錯,令該批申報一直封塵未面世呢?

根據《政治委任制度官員守則》,特首、三名司長、問責局長、副局長及政治助理作為政治委任官員,需要申報財務及其他利益登記、同政黨嘅聯繫、理事會、委員會及其他機構成員身份等,而司局長由於係行政會議官守成員,因此亦要遞交有關行政會議嘅利益申報資料。

有人指上任數天已交申報

由此觀之,政治委任官員作出利益申報係應有之義,但佢哋嘅利益申報供公眾查閱嘅時間,似乎步伐唔一致。資料顯示,七月一日上任嘅司局長,履新「滿月」時,佢哋首份個人利益申報資料已上載政府網頁供公眾查閱。

之不過,陳百里、蔡若蓮、創新及科技局副局長鍾偉強、民政事務局政治助理黎穎瑜、運輸及房屋局政治助理符傳富等十二名副局政助,佢哋齊齊喺八月二日上任,至今工作已超過一個月,各政策局嘅網頁仍然未見佢哋嘅首份利益申報,客觀效果就好似身為下屬嘅副局政助,其申報竟然遲過直屬上司,似乎真係有多少講唔過去。

有副局政助私下透露,上任後幾日已遞交利益申報,對於至今未上載供公眾查閱感到大惑不解。事實上,有部分副局政助非新人,有個別更屬於上屆政府原職過渡至新政府,理應對於利益申報一事有一定政治敏感度,無理由唔知道政界對申報嘅重視程度。

教育局稱「將於日內公布」

我哋曾就陳百里及蔡若蓮嘅申報仍未上載至政府網頁,向佢哋所屬嘅政策局作出查詢,商經局及教育局同樣回覆指處理中,但值得留意嘅係,教育局嘅回覆多咗一句「將於日內公布」,呢句回應真係可圈可點,實在令人增添唔少聯想嘅空間嘞。

第一手消息請下載on.cc東網iPhone/iPad/Android/Windows Phone Apps