中環出更:葉詠詩囡囡學琴學到喊

又到家長幫子女報讀學校嘅季節,唔少家長都會要求子女學樂器,以便寫入履歷冊。香港小交響樂團音樂總監兼著名指揮家葉詠詩出席香港潮屬社團總會婦女委員會嘅午餐分享會時,就用自己嘅經歷,提醒家長「勉強冇幸福」,佢話自己嘅女兒小時候練小提琴,練到滿是淚痕,令佢認命明白唔可以逼女兒學琴。

葉詠詩出生喺音樂世家,佢爸爸葉惠康亦係著名音樂教育家,葉詠詩話自己都曾經喺仔女細個時,要求佢哋學一兩樣樂器,「如果唔學,我爸爸媽媽唔放過我」,但阿仔就唔鍾意睇譜同練琴,阿女睇譜亦都有障礙。葉詠詩曾經試過陪阿女練咗四小時小提琴,結果女兒喊,佢就忟,小提琴上滿是淚痕,於是葉詠詩就明白到唔可以勉強小朋友做唔鍾意嘅事,佢個仔依家係做動畫,女兒就學時裝設計,都係鍾情藝術。

佢又話依家嘅香港家長只係想小朋友學樂器,但就唔想小朋友讀音樂,甚至有好幾個家長嘅仔女到十五、六歲好鍾意音樂,但嗰幾位家長就去拜託葉詠詩嘅爸爸,勸佢哋嘅小朋友唔好學音樂。至於分享會嘅另一位嘉賓、食物及衞生局局長陳肇始就講起,以往喺大學教書,唔使做游說工作,依家加入政府都深深感受到游說工作唔容易做呀,不過亦令佢學到好多嘢。

梁穎宇畀囝囝揀學咩樂器

立法會前議員梁劉柔芬嘅女兒梁穎宇亦有出席分享會,佢話自己剛開始幫囝囝報讀學校,適逢最後一年雙非年入學,競爭都特別激烈,近日亦有親身到拔萃男書院附屬小學排隊,而幫囝囝準備履歷冊時,亦有寫兒子有學樂器,佢都好重視兒子嘅興趣,所以會畀囝囝多啲接觸唔同樂器再揀學邊樣。

講起仔女,潮屬社團總會主席陳幼南就話做父母嘅好想仔女快啲成家立室,而陳太就話女兒已經結咗婚,但係兒子就未結婚,覺得順其自然就得嘞,唔使催促喎。

卓妮

第一手消息請下載on.cc東網iPhone/iPad/Android/Windows Phone Apps