中環出更：跳級讀博士 張國鈞面試遇黎年
唔少立法會議員喺加入議會後，都發現自己有不足，想繼續增值自己。立法會議員張國鈞（Horace）最近去咗港大報讀公共行政學博士，報讀嗰陣都要面試嘅，面試官就係前申訴專員黎年。
唔怕與同學政治立場有分歧
Horace話黎年依家喺港大教書，自己面試嘅時候，咁啱就係黎年擔任面試官，當時黎年已經提醒佢，佢嘅政治立場係建制派，可能會遇到個情況係，其他同學都同佢有唔同意見，佢要以一擋十幾個人，問佢點睇？Horace話自己當時就答，其實已經習慣，從政多年，不時去一啲論壇都會遇到只有佢一個建制嘅情況，佢不時都單打獨鬥（口架）啦！
Horace又話當初報讀課程，係因為做咗議員後，發現自己喺公共政策方面有不足，所以就想去讀吓書，其實佢未讀過碩士就直接報讀博士嘅課程，好彩自己以往喺公共行政嘅經驗都獲認可，所以最終獲得取錄，佢依家已經開始要構思寫乜嘢論文啦！睇嚟佢越級讀博士，都特別努力呀吓。
卓妮