政情：女友錢詩文着熱褲探在囚黃之鋒
香港眾志秘書長黃之鋒，喺月中因衝擊政府總部東翼前地而遭上訴庭加刑，被判即時入刑六個月。黃之鋒入刑多日，其女友錢詩文尋日終於現身壁屋懲教所，佢仲以熱褲裝束示人，唔知係咪預咗監獄入面高溫難受呢？
尋日約兩點四十分，錢詩文聯同兩名男性友人乘搭的士去壁屋懲教所，一見到記者就即刻戴上口罩。三人未知係咪第一次探監唔識路，要先向更亭問路先搵到探訪者等候室作登記。大約十分鐘後，錢詩文步出等候室，拎住紙袋向懲教所進發，但只有一名友人隨行。
友人稱黃精神「OK o架」
逗留約四十五分鐘後，兩人離開時紙袋已不翼而飛，估計係為黃之鋒準備嘅物品。問錢詩文帶咗乜畀黃之鋒，同埋傾咗啲乜，佢都只係話「辛苦晒」。至於同行友人被問到黃之鋒精神狀況時，就連聲話「OK o架，OK o架」，睇嚟黃之鋒都頂得順無冷氣嘅監倉喎！