政情：劉怡翔再「升呢」 過幾日財爺癮
新一屆政府問責官員喺七月一日上任，幾位副局長都成功「升呢」做局長，好似現任財經事務及庫務局局長劉怡翔咁。估唔到，劉怡翔做咗五日局長就「升呢」，由上周四開始至今日下晝出任署任財政司司長，頂替遠赴德國出席二十國集團峰會嘅司長陳茂波（波叔）做財爺。
政府早前公布，波叔喺上周三遠赴德國，以中國代表團成員身份出席二十國集團峰會，今日早上先會返香港。而最新一期嘅憲報顯示，波叔離港期間，劉怡翔會署任財爺職務，上任局長五日就有機會過財爺癮。由於政界中人一直以為，論資排輩應該由特首辦前主任、商務及經濟發展局局長邱騰華署任財爺，所以唔少人對由劉怡翔署任財爺均感到驚訝。
署任財爺人選 非以年資為先
據了解，政府財金官員如外訪或休假，署任財爺人選首選是財經事務及庫務局局長，並非以年資為先，所以做咗五日局長嘅劉怡翔就可以署任財爺職務。至於署任政務司司長嘅人選則會按照局長年資，而目前順序為環境局局長黃錦星以及做咗兩年民政事務局局長嘅劉江華。