政情：阻建制修訂議案泛民搞流會甩轆

尋日下午十二點半左右，立法會接近完成議員就「正視七一遊行市民訴求」議案嘅發言，喺原議案表決前，議員率先就金融服務界議員張華峯提出嘅修正案作出表決。該修正案喺功能團體同地區直選兩個組別都支持下順利通過，但係亦都令民主派陣營大為震驚，發現地區直選組別原來冇足夠嘅在席人數反對修正案。

最終以一票之差通過

喺尹兆堅預備作出總結發言時突然同身邊議員講「決策喇！決策喇！」之後民主派議員就全部離開會議廳。據知，民主派企圖集體離場製造流會，令議案拖延到下星期先表決。然而建制派大部分議員均在席，民主派搞流會計劃極速失敗，五分鐘之內佢哋又跑返回會議廳，投票反對自己提出嘅議案。最後經建制派修訂嘅議案最終就獲得通過。

據知，民主派因為有兩名直選議員社民連梁國雄同香港眾志羅冠聰，因佔領金紫荊被捕，投票時仍被扣留；而另一直選議員自決派嘅劉小麗就因為鬧何君堯厚顏無恥，被代主席李慧琼裁定言詞侮辱性同具冒犯性被逐，再加上公民黨郭家麒不在港而無投票，先至令張華峯提出嘅修正案以十四票贊成，十三票反對，僅一票之差喺地區直選成功通過。

有民主派事後鬧小麗被逐一事好無謂，斥佢無睇清楚形勢就自動離場係因小失大；亦有人話郭家麒做咩唔投票。

被問到係唔係搞流會，尹兆堅話張華峯嘅修訂扭曲佢原議案有關「一國兩制」已嚴重動搖、走樣同變形嘅部分，反而加入香港積極配合國家經濟發展嘅內容，因此作為民主派議員係有責任盡最大努力，阻止違反民意嘅議案通過。佢又話尋日出現甩轆係因為兩個不幸，一係有兩個立法會議員自前晚起被扣留，又有議員被趕離場，令結果逆轉。

其實民主派甩轆漏招並非首次，不幸中之大幸嘅係今次只係無約束力嘅議員議案，即使通過或否決都只有象徵式影響，否則就不堪設想喇！