中環出更：老鼠橫行 陳恒鑌澳門取經防範
港人去澳門多數都係為咗美食，但立法會議員陳恒鑌（Ben）早前去澳門一日遊。嘩，咁歎！非也，佢唔係去搵好嘢食，而係去睇垃圾。何解？咪因為老鼠橫行囉！
睇垃圾收集同分類方法
呢排好多議員變咗「鼠王」，教市民捉老鼠，而阿Ben早前就同助理去澳門，用一日時間睇當地收集垃圾同分類方法，仲大讚澳門絕對值得香港借鏡咁話。佢透露，澳門嘅垃圾收集箱雖然體積較香港大，但係容量就多九倍，因為佢可以將垃圾壓縮。
佢仲話澳門嘅清潔工人會喺晚上將成個收集箱收走，再換個空置嘅供居民用，所以街道較為整潔，傳出嘅異味都較少，認為仲可以減少老鼠曱甴嘅滋擾添！有見及此，佢就建議香港倣效，供香港鄉郊使用，認為可以取代現時鄉郊嘅垃圾收集站，有助改善鄉郊衞生咁話。
其實阿Ben早前落村睇「百鼠樂園」，仲透露當日要另換乾淨衣襪後，太太先批准入屋，而所着嘅鞋更報銷埋添！
卓妮