政情：選擇性維護 記協不譴責漢奸黎卻為網媒出頭
身兼傳媒老闆、天主教徒、且經常將民主自由掛喺口邊嘅壹傳媒黎智英（漢奸黎），六月四日當晚喺維園出席六四祈禱會後，竟向正在場正常採訪嘅東方報業集團旗下記者爆粗恐嚇，事件引起社會廣泛關注，經過各界多番催促及有團體到香港記者協會（記協）會址外示威，先迫使記協發出簡短聲明，但隻字不提譴責漢奸黎，已被轟「揀人維護」。然而記協尋日發表聲明，對政府尋日拒絕網媒記者採訪候任特首同新班子記者會感到極度遺憾及失望，記協為網媒出頭，但唔譴責漢奸黎，明顯又再「選擇性維護」。
漢奸黎早前出席六四祈禱會後，竟向正在場正常採訪嘅《東方日報》記者爆粗恐嚇，除咗「我實會搵人搞×你」、「我影×咗你張相（口架）」，並以「×你老母×」辱罵記者，而涉事記者已報警處理。
冷處理本報記者遭黎恐嚇事件
連日來有聲音要求記協回應及譴責漢奸黎，惟記協只作網上回應，直至早前有兩個團體分別去信要求記協公開譴責漢奸黎及到記協會址外示威，先迫使記協正式發出簡短三行文字版本聲明，但隻字不提譴責漢奸黎，只呼籲受恐嚇嘅記者報警備案，態度溫溫吞吞、模棱兩可，因而被轟「揀人維護」。
然而尋日政府拒絕網媒記者採訪候任特首同新班子記者會，記協事後則迅速發表聲明，對政府嘅做法感到極度遺憾以及失望。記協為網媒出頭，但係就唔譴責刑事恐嚇東方日報記者嘅漢奸黎，明顯係重蹈覆轍，又再「選擇性維護」。
對於政府被批評拒絕網媒採訪事件，以現時互聯網發展速度如此快，市民可以更快喺網上取得訊息，但政府亦應與時並進，唔好故步自封喇！