南韓嘅車模出名樣貌同身材兼備，更被喻為車展上絕不能少嘅亮點，因此每年都有唔少新進車模成功跑出兼成為人氣之最。不過，既然競爭如此激烈，擁有出眾外形嘅車模黃利亞，又憑住乜嘢特別之處，一直保持高人氣呢？
唔少人總以為要成為一個吸睛度高嘅車模方法好簡單，只需要擁有出眾嘅樣貌、火辣嘅身材以及性感造型登場，憑住驕人胸器加上深長嘅事業線，自然能夠成為展場上嘅焦點，咁樣做法亦不為過，但係只能紅於一時，唔能夠一直保持高人氣，而黃利亞就深明呢個道理。事實上，佢嘅外形相當高質，標致嘅五官加上一對迷人胸器，絕對有本錢跑出。利亞最初兼職做Model，憑住亮麗嘅外表，加上唔介意行性感路線，好快佢就喺業界成功突圍。隨住知名度愈嚟愈高，有模特兒事務所邀請佢轉做職業模特兒，不過當時仍在學嘅佢，一直未有咁嘅打算，直至2008年大學畢業後，佢才決定當全職Model。
不過，事務所安排佢首個工作，竟然係以賽車女郎身份喺賽車比賽中登場，由於利亞冇呢方面嘅演出經驗，於是佢好緊張咁問事務所點解會咁樣安排，對方回應話會有前輩照顧佢，叫佢可以放心，同時透過呢種大型賽事嘅工作機會，令佢加快融入賽車女郎界，而最重要係事務所對阿妹充滿信心，認為佢一定可以應付得來。為咗喺賽場上放鬆，利亞將自己活潑一面展露出嚟，希望掩飾內心不安感，卻估唔到獲得大眾讚賞，自此之後，但凡有賽車活動都總會見到利亞嘅身影，而佢亦先後成為多支車隊嘅專屬賽車女郎。
喺2009年利亞以車模身份喺首爾車展上示人，呢次登場令佢人氣急速上升，尤其喺網絡上人氣更係飆升到一個新高峰，而成功登陸車模界後，佢成為首爾及釜山車展嘅常客至今。須知道南韓車模界新人輩出，能夠一直屹立至今，絕對係實力嘅最佳證明。利亞坦言，之所以獲得成功，因為佢骨子裏滲透出對車嘅熱愛。唔講唔知，原來佢對汽車有相當深入嘅認識，從車款、引擎、避震到排氣，以至賽車條例，佢統統都識，係個百分百車迷，而阿妹亦同其他車迷打成一片，經常同對方討論汽車嘅知識。除此之外，佢嘅駕駛技術亦唔錯，事關每當有機會嘅話，佢都會向車手取經，請教一下賽車技術，同時亦會好好練習一番。
近年利亞開始回歸最初嘅模特兒工作，就係做平面攝影模特兒，不過經過多年喺賽場及車展上嘅經驗累積，今日嘅佢面對鏡頭時，唔會單單散發出活潑魅力，只要攝影師有要求，佢都能夠配合到主題，從呢點嚟睇，當年事務所嘅安排的確冇錯。
簡介：雖然利亞覺得自己嘅外形唔算突出，但係欣賞過佢照片嘅男人，都會被佢迷倒，加上激凸嘅身材，更係睇到人流晒鼻血！如果大家想了解佢多啲，或想同佢交流吓汽車心得，就要Click入呢個網站喇。
網址：http://cafe.daum.net/lia-211
出生地：江原道束草市
身高：170cm
三圍：34、24、34
撰文：魂