政情：落手搭建 海峰嶺冀蒙古包現香江
隨着時代進步，好多傳統生活模式及工藝正在消失，例如游牧民族居住嘅蒙古包，已成為世界非物質文化遺產（非遺）。香港內蒙古社團總會會長海峰嶺自細喺內蒙長大，識得一手一腳搭建蒙古包。佢話今年底內蒙古將來港舉行產品展，希望到時可以喺展場搭建一個蒙古包，畀香港人一窺究竟。
海峰嶺一直致力推廣包括唐卡在內嘅非遺，佢亦係內地一間非物質文化遺產研究院院長。佢話中國有三十九項世界級非遺，其中七項喺蒙古，佢笑稱自己係蒙古族，可能因此對於非遺有與生俱來嘅愛好及緣分，亦有一份保護傳承嘅使命感。
自幼居內蒙 一個鐘搭得起
講起蒙古包，由於海峰嶺嘅父親係軍人，所以屋企唔係蒙古包，不過佢自細就喺蒙古包遍布嘅環境中長大，大多數同學仔都住喺蒙古包，所以佢都識得搭建，一個鐘就可以搞掂添！佢話希望年底喺香港舉行嘅內蒙產品展，真係可以搭一個嚟應吓景喇！