政情：懶理黨內反對聲 馮檢基堅持出選九西
青年新政游蕙禎同梁頌恆因為宣誓辱華風波，被法庭裁定取消立法會議員資格，兩人所屬嘅九龍西同新界東議席勢必舉行補選。其中民協元老馮檢基（阿基）表明有意參與九西補選，該黨前日就舉行黨內初選論壇，阿基就列出八大支持佢出戰嘅原因。對於有黨員認為佢勝算唔大，勸佢唔好出選，阿基就話選舉無必勝，又話要用數字說服佢，佢暫時會堅持出選。
阿基前日喺會上提出過千字綱領，列出民協應該支持佢參選嘅八大原因，其中包括知名度高、堅持民生工作、政績豐碩、議會內需要有關心民生的民主派的聲音等，佢又形容年輕候選人已經喺宣誓事件之後，失去市民支持覺得市民會轉投好似自己咁，有往績、可信賴嘅候選人。
稱自己「的確有勝算」
但佢嘅黨友似乎唔係咁睇，有成員就覺得佢出選未必有勝算，而且上次立法會全軍盡墨之後黨內無足夠嘅資源支持佢出選。阿基接受查詢時就話選舉無必勝，而且上次立法會選舉勝選嘅政黨都未必有好多資源，認為黨友要有更有力證據去反對佢參選，佢又話如果有客觀數據，好似民調證明自己支持度不足，自己會知難而退。佢明白黨友有憂慮，但認為自己的確有勝算。
民協中委會早前通過，有意參加立法會補選嘅黨員，必須要取得黨內三分之二嘅信任票支持，先可以代表民協出選立法會補選。有關投票下周二會舉行，有民協中人就估計目前支持同反對阿基嘅人一半一半，以阿基目前表現估計難以取得三分二支持。