中環出更：英超飛售罄證港足有進步 體育專員唔係波
近日老牌球會南華主動退出港超聯，來季降班轉戰甲組賽事，創會百年嚟首次喺低組別角逐。有香港足球總會董事尋日喺一個論壇上質疑政府對球會支援少，但體育專員楊德強就以英超賣晒飛為例，證明港足有進步，隨即畀學者反駁話英超球隊來港作賽，同本地聯賽係完全唔同嘅商品。換言之，即係叫楊德強咪混為一談喇！
該名足總董事喺論壇上指南華降班帶來重大打擊，尤其係打擊球迷嘅心情，又批評政府當年推出「鳳凰計劃」，年花二千萬港元支援香港足球，但實則「政府啲錢完全無去到球會」，資金都用喺完善足總架構、青訓同支持部分足球從業員。
學者批兩者屬不同商品
楊德強承認南華退出港超令好多球迷失望，但過去一年香港足球發展有進步，包括首次有港超球隊打入亞冠盃小組賽、英超亞洲挑戰盃門票售罄等，期望球會繼續努力吸引更多人入場觀賽，然而理大香港專上學院人文、設計及社會科學部講師李峻嶸反駁，指英超球隊來港作賽，與本地聯賽是完全不同的商品，值得討論究竟政府係咪願意扶持本地職業足球。
卓妮