政情:師徒反目陳少棠借力對抗葉傲冬

區議會一向係建制派嘅天下,不過淨係議席多並唔足夠,若果建制派之間唔齊心,隨時「陰溝裏翻船」。政界傳聞,油尖旺區議會主席葉傲冬同前黨友兼「師傅」陳少棠,因為爭做區議會主席而反目成仇,最終陳退黨收場,而兩人之間嘅鬥爭近日更有白熱化趨勢。據聞陳少棠唔單止拒絕出席葉傲冬搞嘅公事飯局,更聯合民主派一齊對抗葉傲冬,今次真係籠裏雞作反。

據了解,葉傲冬同陳少棠之間嘅恩怨源於今屆區議會主席之爭。本身係民建聯九龍西支部主席嘅陳少棠,原本以為自己穩坐區議會主席之位,點知畀徒弟葉傲冬打敗咗,兩人因而結怨,心生不忿嘅陳少棠更加退埋黨,加入另一建制政黨經民聯。

不過陳少棠退黨之後並冇因此息怒,仲不時同葉傲冬對着幹。好似油尖旺區議會年初曾經討論,喺農曆年初一至初三於旺角麥花臣球場舉辦熟食墟市,當時主流建制反對建議,但陳少棠就連同其他建制派議員及民主派議員投票支持有關建議,令議案差一票就險獲通過。

陳希望拉攏民主派

近日陳少棠又有動作,據了解,葉傲冬開區議會前都會約各區議員和民政事務處官員食飯,陳少棠唔單止拒絕出席,更另搞飯局,有至少三個建制派區議員亦同陳少棠同一陣線。知情人士話,除咗建制派,陳少棠亦打算同區內民主派聯手,希望透過飯局拉攏佢哋嘅支持,令葉傲冬喺處理區議會事務時受制。

九年前,葉傲冬參加補選而躋身油尖旺區區議員,當時身為民建聯資深區議員嘅陳少棠,曾幫葉傲冬熟悉議會環境及運作,兩人都算有一段師徒情誼,點知依家變成仇家。

葉盼理順議員關係

陳少棠接受查詢時就話傳言「無聊」,稱自己就算唔同葉食飯,自己都要食,又話同葉傲冬關係同以前一樣喎!至於葉傲冬就話唔評論事件,不過坦言希望理順議員之間嘅關係。佢話理解議員各有各忙,未必出席飯局都屬正常。佢又話,隨時歡迎同陳少棠夾個時間食餐飯喎。

講到尾,陳少棠搞咁多花臣,都係為咗啖氣,要化解,就要睇吓葉傲冬有冇足夠嘅政治智慧去拆解喇!

第一手消息請下載on.cc東網iPhone/iPad/Android/Windows Phone Apps