政情：公民講場：大橋造假 政府死撐 盧偉國怒轟後知後覺

港珠澳大橋近日被揭石屎檢測造假醜聞，其實政府早喺去年中已發現有問題，但遲至今日都未搞清楚問題範圍有幾大，死撐大橋冇安全問題可繼續開工。身兼香港品質保證局主席嘅工程界立法會議員盧偉國尋日喺電台批評，政府當初發現問題後，應立即提高層次跟蹤追查，而唔係拖到廉署拉人先至臨急補鑊；政府懶懶閒令到問題擴大，最後對本港整個工程建造及檢測認證行業都帶嚟負面影響。