中環出更：太太敷mask鄧家彪環保重用
消委會早前公布調查發現，有啲面膜有致敏化學物質，唔少女士都有留意吓，原來男士就冇咁留意成分嘞！勞僱會勞方委員鄧家彪（Bill）自爆，自己會敷太太敷完嘅面膜，仲話自己好環保，亦因此永遠唔會敏感出事喎！至於立法會議員何啟明就話，太太逼佢就會敷面膜o架喇，「我塊面佢都有份用o架嘛」，不過佢都唔知係乜嘢成分嚟。唔知係乜嘢都敷上面，認真大膽！
阿Bill話自從結婚後就開始咁樣敷面膜，覺得都幾舒服，通常太太敷完二十分鐘，就會畀佢敷五分鐘，有時太太覺得面膜太潤，就會即刻畀佢敷。問佢唔怕細菌咩？佢就話「又唔係針筒，面膜之嘛」，形容等如係「啲骨仲有啲肉呀，你食埋佢啦」，但佢一直唔知係乜嘢面膜嚟。
何啟明悟「唔好得罪老婆」道理
何啟明就話太太覺得佢塊面唔掂當，就會逼佢敷面膜，通常都係叫佢搽啲面膜，等十分鐘後洗面，不過佢亦唔知係乜嘢嚟，被問到太太毒死佢都好容易，佢就妙答「所以唔應該得罪老婆囉，呢個永恒嘅道理嚟嘛」。
男士就唔知搽乜嘢上面，但原來政界嘅「女漢子」直情唔敷面膜！工聯會會長林淑儀就話平日都冇乜敷面膜，但如果有人送畀佢嘅話就會敷下，不過成日都擺到過期扔晒都唔得閒敷。
咁老公、立法會議員黃定光（象哥）有冇買畀佢呢？佢即刻笑笑口話「梗係冇啦，佢都唔識買，根本唔知乜嘢叫mask」，仲叫大家見到象哥就考下佢識唔識係乜嘢嚟？
深水埗區議員陳穎欣亦話冇乜敷面膜，連搽潤膚膏都要妹妹提嘅，平日保養就靠做多啲運動，同保持心境開朗。佢又大爆妹妹有時氹佢，話買埋佢嗰份，結果最後都係自己用埋。至於立法會議員梁美芬就姿整少少，都會敷面膜嘅，仲好小心避免敏感，通常都靠美容院推薦，唔會喺街買。
卓妮