政情：公民講場：劉小麗又籌款驚工黨袋住先？

最近加入工黨嘅自決派劉小麗繼之前六四及七一籌款後，實行吸金吸到盡，本周六以小麗民主教室名義搞多場籌款晚宴，睇怕都係為嚟緊十一月立法會九龍西補選籌旗。晚宴會以餐券形式發售，小麗仲特登提醒出席者嘅支票抬頭雖然係寫「工黨」，但必須要註明係小麗民主教室籌款晚會，驚死啲捐款落唔到佢袋咁。不過，又難怪小麗嘅，事關工黨前立法會議員李卓人曾有將捐款「袋住先」前科，如果唔寫清楚，真係分分鐘被人袋走埋都似！