政情：徐立之踢波唔使用腳

香港人出晒名工作繁忙，冇時間做運動，即使係鍾意足球嘅朋友，都唔係咁容易搵時間去踢波，要約埋朋友一齊去踢波就更難。對球類運動樣樣皆精嘅創科院院長、香港大學前校長徐立之尋日就有機會過吓「足球癮」，仲喺眾人面前示範點樣唔用腳都可以踢波添！到底佢搞邊科呢？

徐立之尋日出席VTC STEM 教育中心嘅開幕活動時，主動了解同學仔嘅科研產品，佢一見到由同學製作嘅足球機械車，就趁機過一過「足球癮」，即刻用手機應用程式當係遙控器，單手控制部機械車射波入模型龍門，真係成個足球小將咁！

唔講可能都唔知道，原來徐立之除咗鍾意做研究之外，對排球、足球、籃球都樣樣皆精，一有空餘時間就會做運動調劑緊張生活，佢之前仲話過自己射籃嘅命中率有七成添！唔知同學仔會唔會發明埋多幾款機械車，等徐立之可以再過下手癮呢？