政情：陳茂波恐逼降呢掌運房局
新一屆特區政府仲有約個半月就上場，但三司十三局問責團隊仍未齊班，其中負責興建公屋居屋、落實高鐵一地兩檢，以及確保港珠澳大橋如期開通嘅運輸及房屋局局長職位，至今仍未搵到適合人選。由於現任運房局副局長邱誠武（邱副）表現欠佳，難以勝任以上全屬「重之中重」嘅工作，據聞候任特首林鄭月娥有意調派現任財政司司長陳茂波（波叔）出掌運房局。至於波叔自己願唔願意「降呢」減薪做番局長，就不得而知喇。
我哋之前寫過，民主黨立法會前議員羅致光已獲邀加入新政府，最初有指雖然佢本身來自社福界，但由於喺業界內有唔少仇口，可能會改派佢做運房局局長，接替已肯定會離開政府嘅現任局長張炳良。但最新說法係，林鄭都係鍾意迎難而上，屬意由羅致光做番勞工及福利局局長，變成運房局局長未有人接手。
傳搵陳家強做財爺
正所謂蜀中無大將，廖化作先鋒，喺無其他更好人選之下，多名表現唔算太差嘅現任副局長，都有望喺下屆政府「升呢」做局長，包括食衞局嘅陳肇始、保安局嘅李家超、教育局嘅楊潤雄，以至財經局嘅劉怡翔同商經局嘅梁敬國等，唯獨係做傳媒出身、身為資深副局長嘅邱副，就不論係政界、業界同政府內部，都覺得佢未夠班升做局長。尤其下任運房局局長要負責落實房屋、高鐵及港珠澳大橋等重要項目，必須要搵個政治上絕對信得過嘅人選，唔單止係考慮有冇能力。
眾所周知，波叔雖然民望長期偏低，又擁有「劏房波」、「囤地波」等負面外號，但講到政治信任度就完全唔係問題，因此先有人力撐佢留任做財爺，逼新政府硬啃。但據聞林鄭始終唔係好鍾意波叔，仲游說緊其他人做財爺，甚至有傳會搵番本已決定喺七一後離巢嘅現任財經局局長陳家強，如果真係畀佢搵到個更勝任而又獲中央信任嘅人選，可能就會叫波叔轉做運房局局長。
波叔升任司長前做開發展局局長，對房屋政策亦有一定認識，加上運房局屬政務司司長管轄範疇，並非隸屬財政司，唔算直接上司變下屬咁尷尬。不過，由司長變局長始終係「降咗呢」，而且要減薪同遷出啱啱先裝修完嘅財爺官邸，唔知波叔肯唔肯制呢？