中環出更：手機玩唔掂 葉建源搵助理打救
科技日新月異，以前就靠書信同打電話來往，依家只需要用智能手機，下載啲通訊程式就可以隨時隨地傾偈開會等，好似已經做咗一屆嘅立法會教育界議員嘅葉建源，雖然由智能電話嘅新手變到愈玩愈上手，但遇到有問題，都係倚賴助理幫佢解決。
依家愈玩愈上手
原來葉建源未做議員之前一直都只係用只係「打出打入」嘅手機，而喺選舉過後，助理叫佢轉用智能手機，佢先開始用。佢話好彩有助理幫手，教埋佢點樣用之餘，一遇到有困難仲會即刻幫手，難怪依家嘅佢愈玩愈上手喇！
不過，葉建源就話以前用用吓有唔明，會問完助理之後自己試吓解決，但依家慢慢會演變成咗倚賴助理，一有唔妥就直接等助理解決問題。咁搞法，如果佢唔做議員，咁點算？
相信唔止葉建源，仲有好多議員都慢慢學緊點用智能手機。今屆好彩有唔少年輕一代嘅議員，如果佢哋肯教吓路幫吓手，會唔會化解到議會嘅氣氛，拉近距離呢？
卓妮