中環出更：食素營養唔均衡？楊大偉：講法過時
香港人近年愈嚟愈注重健康，除咗比以往熱衷做運動之外，主張素食主義嘅人士亦有所上升。社企Green Monday創辦人楊大偉（David）就係素食者，但佢嘅家人並唔係同佢一樣食全素，佢就解釋唔係擔心營養唔均衡的問題，反指呢種講法過時添！
David育有分別七歲同四歲嘅囡囡，佢哋平日只有七成食物係素食，因為David希望囡囡能夠出於自願咁茹素，所以咪冇強迫佢哋囉，完全同食素營養唔夠均衡嘅講法無關！David更認為現今食肉類風險更大，因為含有太多激素，而早前更出現多宗食安問題，好似巴西肉等。難怪佢有咁嘅睇法，仲話茹素營養欠均衡呢個講法已經落伍。
麥玲玲都鼓勵客人茹素
其實尋日係「Green LUCK無綠不歡」飲宴頒獎典禮，以表揚積極推動環保嘅婚宴業界，連環保局局長黃錦星都有現身支持。Green LUCK大使兼堪輿學家麥玲玲就話，自己一個月最少有一半時間茹素，而佢平日都好鼓勵客人茹素，因為減少殺生對運程有幫助，而且肉類含有毒素相對無咁健康，而有唔少客人都聽佢講多食素。
香港餐飲聯業協會會董黃傑龍只係間中食素，但佢有開設專門食肉嘅食肆，竟然係第一批響應Green Monday喎。佢透露，當年向日本方面請求加入素食時遭到反對，好彩經佢一番游說同解釋終能成事。另外，佢旗下食肆多數用電子落單，所以非常關注近日影響全球嘅電腦中毒事件，好彩視窗系統最新，而且平日更新頻密，所以暫時冇中招，但佢都唔敢掉以輕心，話要多做備份喎。
卓妮