政情：林鄭恐玩殘自己
候任特首林鄭月娥當選特首之後多次表明要修補社會撕裂，同埋改善行政立法關係，而佢亦都坐言起行，近日已經同立法會唔同黨派議員會面，仲伸出橄欖枝添！聽聞林鄭提出咗兩項建議以改善同立法會嘅關係，包括佢會每個星期都出席立法會會議，變相將特首答問大會變成每周例會；另一建議就係縮短立法會議員喺立法會大會提出口頭質詢嘅預告期，令質詢議題更具時效及貼地。不過林鄭呢兩招分分鐘玩殘自己同政府官員，話唔定仲會釀成「關公災難」。
林鄭當選後就密密同立法會各黨派會面，有與會者爆料，林鄭主動向立法會議員提出改善關係嘅建議，其中之一就係佢每周出席立法會大會，每次一小時，又或者每兩周即到立法會一次，每次一小時，直接回應議員提問。
過往每隔一段時間立法會就會舉行特首答問大會，特首會出席會議回應議員提問。不過近年行政立法關係轉差，特首答問大會舉行次數已比前兩屆政府少，次次開會都免不了出現衝突場面，激進派例必叫罵，甚至衝出向主席台掟嘢，搞到要腰斬答問大會。好似二○一四年七月，特首梁振英出席立法會特首答問大會，時任立法會議員黃毓民就向佢掟杯，最終仲鬧上法庭。被稱為「奶媽」嘅林鄭如果咁頻繁出席答問大會，可能要先練好一身好武功，準備隨時接飛來嘅奶樽。
縮短口頭質詢預告期
即使林鄭好打得，唔代表政府官員同佢一樣。林鄭改善關係嘅另一個建議，就係縮短議員喺立法會大會提出口頭質詢嘅預告期。現時議員若想喺立法會大會提出口頭質詢，須於開會前七日送交立法會秘書處，以便政府官員準備資料。唔少議員都認為七日預告期太長，到開會時議題可能都過晒氣。
林鄭嘅建議無疑有助議員提出質詢時更「貼地」，不過隨時亦會帶嚟反效果，因為一旦出現重大事件，萬一負責官員回應議員質詢時準備不足，應對質素太低，又或者只係交行貨，議員實會趁機會圍插，隨時變成「關公災難」。林鄭嘅建議固然勇氣可嘉，但到頭來可能反而令關係仲緊張添！