話模特兒有事業心，相信唔少人都覺得係吹水，但事實又係咪咁呢？南韓人氣車模高正雅正正係事業型模特兒嘅代表，事關擁有迷人外形及火辣身材嘅佢，早就憑住參加選美比賽而成名，但係佢考慮咗好耐先至投身車模界，並且全情投入咁工作，相當有事業心。
出生於釜山嘅高正雅，憑住高挑身形同玲瓏浮凸嘅身材，一直都係男士眼中嘅美女。雖然佢都唔覺得自己靚，但2004年喺慶南大學就讀嘅佢，喺朋友推薦下，參加世界大學小姐比賽，結果獲得優異嘅成績。佢表示冇諗過會參加選美，但係透過呢次比賽，讓佢見識一下更大嘅世界，所以才決定參賽。翌年佢又抱住同樣心態，參加南韓選美比賽，憑住出眾嘅外形及大方得體嘅表現，佢嘅名字開始為人所熟悉，亦吸引咗唔少模特兒公司向佢招手，不過當時佢並未考慮投身模特兒行列，原因係佢對呢個行業一啲都唔認識，亦唔知道模特兒嘅前途如何，所以佢希望畀啲時間自己慢慢考慮同觀察，分析一下再作決定。
佢足足考慮咗2年，而喺呢段時間佢不斷同各大模特兒公司接觸，了解更多關於模特兒工作及未來計劃後，終於決定先喺兼職攝影模特兒方向出發，除咗因為工作較為容易安排外，亦可以從中吸收工作經驗，最重要係讓佢掌握攝影技巧。佢解釋作為一位模特兒，一定要有相當嘅攝影知識，先至知道自己喺乜嘢情況之下，可以同攝影師合作拍攝出一張迷人照片。當佢累積得相當經驗後，2010年佢首次喺首爾車展中，以車模身份登場，而呢次處女演出，亦係佢模特兒生涯嘅重要時刻。
呢次處女演出不但令佢人氣急升，同時亦獲得唔少汽車品牌賞識，自此成為車展常客，而佢亦決定以後專注於車模界發展。事實上，佢不但先後喺多個大型車展中亮相，喺2010年便開始踏入賽車界，化身成性感迷人嘅賽車女郎，喺賽道上散發火辣熱力，及後更擔任賽車車隊嘅專屬賽車女郎。須知道，車隊都會搵啲具有人氣兼有一定經驗嘅車模出任專屬賽車女郎，甚少會搵好似高正雅咁出道冇耐嘅新進車模。有傳佢之所以被睇中嘅原因，除咗因為佢所簽嘅車隊，係同佢之前喺車展中站過台嘅汽車品牌關係密切外，更因為佢有參加選美比賽嘅經驗，即使面對大場面，仍然表現淡定。
自此之後，佢先後喺多支車隊內擔任賽車女郎嘅工作，不但收入大增，大量嘅曝光機會，更令佢嘅人氣愈嚟愈高。雖然佢喺車模界獲得相當唔錯嘅成績，但佢仍然覺得自己有欠缺嘅地方，究竟佢仲欠缺啲乜呢？佢覺得自己所欠缺嘅就係攝影嘅認識，原來佢以前曾經學過攝影，但係隨住工作經驗增加，發覺所學嘅攝影知識同技術已經跟唔上時代發展，另外最重要嘅係，未來終有一日會離開模特兒界，呢個時候佢就會朝住攝影界發展，因此佢認為應該趁住呢段時間，為未來打好基礎。
簡介：高正雅甜美嘅樣子固然吸引，但係講到最誘人嘅地方，莫過於一副玲瓏浮凸嘅身材，尤其係嗰條引人入「性」嘅蛇腰，輕易成為男士嘅焦點。如果大家想欣賞多啲正雅嘅性感靚相，就要Click上佢嘅IG啦！
網址：https://www.instagram.com/ko_jeong_a/
出生地：釜山
身高：173cm
三圍：34、25、35
撰文：魂