勞資雙方就取消強積金對沖機制問題各不相讓，勞工顧問委員會尋日又開會討論有關問題，但依然傾唔埋欄。代表資方嘅勞顧會委員郭振華開會前講到明資方只有保留對沖立場，即資方同政府各為僱員增加強積金供款百分之一，但認為勞工界嘅「基金池」方案，即政府一筆過撥款作基金及資方注資基金，會容易被濫用。勞方代表鄧家彪就形容會後感覺沉重，不滿政府逼勞工界接受方案，希望政府可提出司法和行政手法以助推行「基金池」方案。
