因貪腐問題正被國際刑警全球通緝嘅內地富商郭文貴，日前接受壹傳媒黎智英旗下嘅《蘋果日報》獨家專訪，聲稱內地公安及國安等執法機關，長期喺香港進行大規模監控，但未有提供任何實質證據。「香港本土」立法會議員毛孟靜尋日向內務委員會申請，要求就郭文貴有關「爆料」內容，「打尖」喺下周嘅立法會大會提出急切質詢，但最後就畀建制派鬧爆兼否決，自取其辱。
工聯會議員郭偉強喺會上直斥毛孟靜「重口味」，對郭文貴嘅所謂「爆料」大為緊張，反問毛孟靜點解唔去跟進有泛民議員涉嫌收取外國「黑金」嘅報道。另一議員黃國健更加話，郭文貴對《蘋果》講幾句說話，民主派就如獲至寶，「對肥佬黎好厚愛」。
眾所周知，身在海外嘅郭文貴近期嘅連串舉動，目的係想威逼內地同外國政府，放棄將佢引渡返中國受查同放生佢喺內地嘅黨羽。佢所謂嘅「爆料」內容，絕大部分都係流料，偏偏毛孟靜就照單全收，將謊言當做事實要求港府回應，難怪佢會被戲稱做「正盲毛」喇！