政情：陳易希夥拍母校推教學App
有「星之子」之稱嘅本土發明家陳易希（Stark）近年專攻手機應用程式，最近佢又再有新搞作。話說Stark成立嘅公司就同佢嘅母校中華基督教會譚李麗芬紀念中學合作，因應該校老師運用數學教學軟件設計嘅一系列互動課件，設計番相應嘅應用程式，畀學生可以透過平板電腦進行多樣化嘅數學學習活動。而呢一個數學學習應用程式仲要係免費，全港師生都可以用o架。
涵蓋大部分必修課程
語文可以透過努力背誦去學習，但數學概念就必須充分理解先能夠好好掌握。唔知係咪因為見到中學時代同學學習數學嘅艱辛，Stark最近就同母校合作，推出名為「gMath」嘅應用程式，內藏二百幾個互動課件，涵蓋大部分中學數學必修課程，仲有齊中、英文版本添。
學生可以利用平板電腦進行唔同嘅數學練習，比起用傳統紙筆相信有更大樂趣。該校仲透露日後應用程式會持續增加同修訂課件內容，甚至會考慮加入埋小學數學課件添。