政情：長毛又爆粗波哥不惱怒
立法會議員梁國雄（長毛）本周二先至在立法會財務委員會審議亞洲基礎設施投資銀行（亞投行）六十億元撥款時爆粗，以冒犯性詞語「Dickhead（笨蛋、蠢貨）」辱罵官員，被財委會主席陳健波（波哥）逐離場，點知事隔三日又再發作。尋日長毛就先後喺保安事務委員會同財委會上化身「粗言字典」，以粗俗詞語鬧唔准立法會議員入境嘅澳門官員同波哥。不過，保安事務委員會主席陳克勤同波哥都冇騷長毛，唔知係咪費事跌入長毛嘅拉布圈套。
長毛喺立法會爆粗、以侮辱性言詞辱罵他人早有前科，○九年財委會討論安老院舍時佢就因為不滿官員答覆突然爆粗鬧「×街」；到一○年討論政改，就鬧同佢持不同意見嘅時任議員司徒華「癌（症）上腦」，結果被各界狠批惡毒；一五年審議財政預算案時，佢亦將政府力推嘅六大產業講成「六大『冚家』產業」。
繼本周二後，長毛又再嚟料。尋日朝早保安事務委員會上講起多名立法會議員未能入境澳門一事時，長毛就扯火大鬧澳門官員︰「呢個澳門嘅Figurehead（首腦），即係元首，佢係Shithead（白癡、蠢蛋），即係草包！」又話︰「崔世安（澳門特首）嚟香港唔畀佢嚟得唔得呀？當然唔得啦！係咪呀Figurehead，佢係Shithead呀！我再講一次呀，唔畀人入境都係Shithead！」
其他議員聽到長毛嘅粗俗言詞都「嘩」一聲，長毛唔知係咪怕又被人趕出會議室，於是急急補鑊話「Shithead」唔係粗口。主持會議嘅克勤並冇趕長毛出會議室，亦冇同佢爭論，只係話長毛只係意見陳述，會議就咁繼續進行喇。
重提周二會議寸波哥
至到下午財委會開會，繼續審議亞投行撥款，長毛就重提喺周二打算提出嘅中止待續動議。因為波哥喺周二會議時聲稱「甩嘴」，將「如果」講咗「×你」，長毛尋日發言時就寸爆波哥，話做主席要「一言九鼎」，「漏口要道歉就唔好做主席喇阿哥，成日疑似粗口咁點搞呀？」
長毛講完都仲未夠喉，繼續發炮︰「唔會話你係Dickhead，話你係Thickheaded（愚笨），但係唔可以做Shithead o架知唔知，都唔可以warhead（彈頭），又唔可以草包咁樣，唔可以飛彈彈頭射人，聽教啦！」雖然長毛連珠炮發，但波哥今次就完全冇回應，亦冇對佢嘅言論作裁決，等長毛噏完就叫下一位輪候緊嘅議員發言喇。
長毛上次爆粗，波哥將佢逐離場，最後搞到會議要提早結束，唔知係咪經一事長一智，所以克勤同波哥今次都唔再中計呢？