中環出更：游蕙禎又教扑嘢 「最重要氣氛」
被取消立法會議員資格嘅青年新政游蕙禎，早前因去年十一月衝擊立法會會議室而被捕，之後就未有蒲頭，前晚佢終於現身電視機螢幕，擔任節目嘉賓。不過，游蕙禎今次就冇再講政治、鼓吹港獨，而係大談性空間，話依家後生仔冇地方發生性行為，只能夠去時鐘酒店，但衞生並唔理想，仲要排隊一個鐘。至於何謂其理想中嘅「空間」，佢就話「最重要氣氛」喎。
話港性教育似上生物堂
游蕙禎在一集以「性空間」為主題嘅節目中話，佢自細同母親同床瞓咗十幾年，到青春期都冇私人空間，依家啲後生仔要發生性行為就只能去時鐘酒店，或花錢光顧正式酒店及拍拖外出旅遊。游蕙禎亦提到本港性教育，直言「好似上緊生物堂」，話本港性教育廿年不變，內容都係生物學及病理學資料，對於男女兩情相悅時如何處理，以及跨性別及不同性傾向都完全冇着墨，令人唔敢追求性權利。她又以自己父母為例，話父母偏向保守，認為靠父母灌輸性教育並唔可行。
游蕙禎之前亦喺公開場合發表過「扑嘢論」，話青年人就算要扑嘢（做愛），都搵唔到房去扑。似乎游蕙禎對青年人性問題都非常關心，唔知佢自己又有冇煩惱呢？
卓妮