中環出更：MMA打贏太極拳周國豐話武德最重要
早前綜合格鬥（MMA）狂人徐曉冬擊敗太極拳師魏雷，引起熱烈討論。早前卓妮喺活動上見到香港國術總會副會長周國豐，佢就覺得單憑一場比賽唔可以斷定邊個門派好定不好，而練武亦一向着重個人修行及武德。港協暨奧委會副會長胡曉明及霍啟剛亦認同武德好重要，而禮貌及尊重則係做人基本。
香港國術總會日前舉辦第二屆全港兒童武術大賽，超過六百名小學生參加。講起早前徐曉冬與魏雷的比試，香港國術總會會長王嘉恩就認為，如果對方跌在地上都照打就唔係咁好喇，但指兩人既然同意比武，就清楚知道後果及代價。佢亦唔認同徐曉冬對中國武術的睇法，認為對方了解唔深入，強調太極不只是養生，進攻防守方面亦好強，佢就親眼見過太極高手黐一黐手就將對手彈開十幾呎。
霍啟剛支持仔女學武
胡曉明以及霍啟剛亦認同武德好重要。胡曉明認為武術係教人點尊重他人和對手，而禮貌則係做人基本。霍啟剛細個亦學過詠春幾年，○八年曾在北京武術學院深造一個月，指武術不止於練武格鬥，最緊要學識尊重，背後亦有深遠文化，呢啲先係武術最博大精深之處。講起女兒霍中妍剛出世幾日，啟剛話會鼓勵及支持仔女日後學武。
民政事務局副局長許曉暉及香港國術總會名譽會長施家殷亦有出席，施家殷就話，一個一百米九秒九跑手同一個馬拉松冠軍比較，跑十公里邊個快，結果唔代表啲咩，所以不同門派各有精深博學，練武講求強身健體及武術精神，同格鬥比賽的目的並不相同。
卓妮