每年六四前夕民主派都會爭取於立法會提出「平反六四」議案，過往多次都係由民主黨（白鴿黨）立法會議員提出。但近年受民主派自己拉布所累，議案多數都過晒期。
今年民主派放軟手腳唔就政府財政預算案拉布，原本有機會可以如期就六四事件進行辯論，白鴿黨全數七名議員亦打算用大包圍策略，一齊入紙抽籤提議案。但由於白鴿黨七人連續十次都抽唔到籤，加上激進派預告會繼續就預算案拉布，今年嘅「平反六四」議案辯論睇嚟都係凍過水。
每次立法會大會均有兩名議員可動議不具法律約束力嘅議員議案，不過就要抽中籤先可以提出。今屆立法會開鑼至今，白鴿黨七議員竟然一次都抽唔中，都算係「黑仔之最」。由於抽唔到議案，立法會又將就預算案進行辯論，因此，白鴿黨好大機會無法如期提出六四議案喇！
另外，立法會將於下次進行辯論嘅議員議案，分別係由公民黨議員郭家麒提出嘅「促請下任行政長官重啟政改」，及議員毛孟靜提出嘅「改善本港的英語教育質素」。見到其他民主派議員抽中議案，唔知白鴿黨會唔會眼紅呢？