中環出更:七議員擬大包圍提「平反六四」議案

每年六月四日前夕,民主派議員都會爭取在立法會中提出「平反六四」嘅動議,然而近年受拉布拖累,議案多數都係過期辯論,去年更索性取消。據了解,因應身兼支聯會委員嘅議員都已經退下火線,今年提出六四議案嘅重任落入民主黨(白鴿黨)身上,而為保完成使命,該黨決定採用大包圍策略,七名立法會議員都會入紙抽籤,務求六月四日之前有人中標。

尹兆堅搵黨友幫手入紙抽籤

據知,今年六四議案由身兼支聯會常委嘅白鴿黨尹兆堅(肥尹)負責,但由於議員議案要抽籤,抽中咗先可以提,所以有機會出現甩轆。有見及此,肥尹尋日就喺黨團要求黨友幫手,七個人都入紙抽籤,加強中標機會,務求可以順利完成任務。抽中咗嘅議員可以有兩個選擇,一係就自己提出議案,又或者將機會交畀肥尹代勞。

倘預算案拉布或致「過期辯論」

不過,大包圍計劃都有一個隱憂,就係要視乎其他民主派議員會否在今年嘅財政預算案發動拉布,如果拉布戰持續,六四議案仍然都係無機會討論。

其實提出「六四議案」係整個民主派嘅責任,究竟邊樣重要啲,就要視乎拉布嘅議員點睇喇。

卓妮

第一手消息請下載on.cc東網iPhone/iPad/Android/Windows Phone Apps